Il Big Air na turna definitivamain betg pli a Cuira. La suprastanza da Cuira ha approvà da schliar en enclegientscha la cunvegna da collavuraziun cun la First Event SA per il festival Big Air Cuira. Cun quai finescha suenter quatter ediziuns in chapitel marcant or da l'istorgia dals events a Cuira.
Decurs dal festival da sport e musica
Cun il conclus dals 24 da zercladur 2021 aveva il parlament da Cuira stgaffì la basa per realisar l'emprima giada il Big Air l'october dal medem onn. Sin basa dal grond success da l'emprima occurrenza hai dà ina votaziun communala per realisar quella er ils onns 2022 fin 2026. Las votantas ed ils votants han votà persuenter il favrer 2022. La finamira era da posiziunar la citad da Cuira sco Host City a favur d'ina occurrenza internaziunala da sport da freestyle e musica.
Ultra da las contribuziuns finanzialas ha la citad mess a disposiziun per quest intent er l'areal Obere Au e servetschs urbans. Entant che la First Event SA è stada responsabla per l'organisaziun generala, per la finanziaziun, per la realisaziun e per la ristga.
Tenor la cunvegna fissan stadas prevididas tschintg ediziuns. Pervia da las lavurs vi da la nova halla d'event a l'Obere Au ha l'ediziun da quest onn stuì vegnir annullada. Pliras ediziuns da l'event da sport eran idas a fin cun gronds deficits, in svilup persistent dal Big Air na saja uschia betg pussaivel, argumentescha la citad da Cuira. Per Hans Martin Meuli èsi dentant impurtant d'accentuar che la chapitala grischuna na saja betg stada la partida che haja decis davart la fin da l'eveniment. La suprastanza avess gì beneventà sch'il Big Air avess anc gì lieu pliras giadas a Cuira.
La citad da Cuira n'ha betg decidì da terminar l'occurrenza. La citad da Cuira ha stuì prender enconuschientscha ch'i n'è economicamain betg pli stà supportabel per l'organisatur First Event SA da cuntinuar cun l'occurrenza en l'avegnir.
Ins saja uschia sa cunvegnì cuminaivlamain – la citad ed ils organisaturs – da schliar il contract avant che quel scrudass il 2026.
L'organisatur First Event SA
Era per René Götz, il mainafatschenta da la First Event SA, na saja quai betg stà ina simpla decisiun. Gist perquai che l'emprima ediziun saja stada in tal success. Ma ils onns suenter haja il public mancà adina pli e pli fitg, ils custs sajan creschids - fin ch'els n'hajan betg chattà ina schliaziun co salvar l'occurrenza.
Consequentamain èsi sa mussà ils ultims pèr onns ch'il Big Air n'è economicamain betg pli supportabel.
Er Swiss Ski deplorescha la decisiun
La federaziun svizra che represchenta il sport da naiv sin livel naziunal, Swiss-Ski, mussa dischplaschair envers la fin dal Big Air.
Per nus èsi fitg donn, pertge che nus avain pudì cumenzar la stagiun cun quest highlight a Cuira. Quai è stà perfetg per las atletas ed ils atlets ed era per purtar il sport da freestyle en ils chaus da la populaziun.
La federaziun da skis è dentant gia en discurs cun auters organisaturs da l'entira Svizra per pudair porscher in'occurrenza sumeglianta uschè spert sco pussaivel. Cu, en tge furma e nua – quai n'è per il mument anc betg cler.
Ediziun custa 4,5 milliuns francs ad onn
L'eveniment sportiv ensemen cun ils concerts custia mintg'onn enturn 4,5 milliuns francs. Ils gronds custs sco la tribuna e la schanza sajan tant sco fixs. Spargnar possian ins be tar piculezzas tschà e là, uschia aveva ditg il president dal comité d'organisaziun dal Big Air Victor Zindel gia l'october 2024 envers RTR.
Sco il president da la citad da Cuira da lez temp, Urs Marti aveva ditg envers RTR è oriundamain be stà previs ina finanziaziun da partenza e che l'occurrenza vegnia suenter a pudair sa finanziar sezza. Entras la cumplexitad da l'eveniment cun construir ina schanza sco er porscher concerts, saja ina finanziaziun statala necessaria. Perquai avev'ins vulì guardar sch'ins chatta ulteriurs sponsurs che contribueschan a l'eveniment.