Mardi saira è vegnì preschentà in nov studi davart il tractament da metastasas da l'oss a l'ASCO a Chicago. L'ASCO è la radunanza annuala da la societad d'oncologia clinica dals Stadis Unids (American Society of Clinical Oncology), in dals pli gronds congress spezialisads da quest champ. Il nov studi è ina collavuraziun dal «Swiss Cancer Institute» e divers ospitals svizzers – tranter auter dal center per la perscrutaziun da cancer a l'Ospital chantunal a Cuira.
La perscrutaziun ha mussà che Denosumab, in medicament impurtant per tractar metastasas da l'ossa tar pazientas e pazients cun cancer dal sain u da la prostata, po vegnir furnì cun tutta segirezza mintga 12 emnas empè da mintga mais. Il professer Roger von Moos, manader dal studi e dal center da perscrutaziun da cancer da l'Ospital chantunal a Cuira, ha explitgà ils trais effects positivs da questa scuverta.
Avantatgs per las pazientas ed ils pazients
Las pazientas ed ils pazients pateschan da main effects secundars, en spezial da main cas da necrosas d'oss da la missella. Ultra da quai ston ellas ed els vegnir ospitalisads pli darar, quai che signifitga ina distgargia considerabla per ellas e per lur confamigliars.
La medema efficacitad, custs pli bass
Il studi ha mussà che la terapia ha in effect, sche la durada dal tractament vegn prolungada sin 12 emnas, e quai precis tuttina sco tar ina consegna mensila. Ils custs per ils medicaments sa reduceschan per 53% tar las totalmain 1'380 pazientas e pazients examinads.
Distgargia dal sistem da sanadad
Il persunal da sanadad vegn distgargià considerablamain en vista a la mancanza cronica da persunal. El na sto betg pli s'occupar 13 giadas ad onn da las pazientas e dals pazients, mabain mo pli quatter giadas.
Las emprimas reacziuns, èn stadas positivas, quai tenor Roger von Moos. Quai ch'è vegnì scuvrì en la chapitala grischuna, pudess daventar in protocol da standard che vegn applitgà sin l'entir mund.
