Marcel Bundi è il schefmedi da la chirurgia da l'ospital regiunal Surselva. Tar els hai dà pli paucas blessuras en connex cun sport d’enviern. Tenor el è quai cunzunt perquai ch'igl ha pauc naiv e la glieud na giaja perquai betg bler sin pista. Els han gì nagin che ha gì accident cun scarsola u passlung. Era accidents cun skis ed aissa èn sminuids. En cumparegliaziun cun l’onn passà, per radund 30%.
Il schefmedi en il center da sanadad Savognin, Stefano Corra, vesa quai era uschia. «Jau ves la pista davent da mes biro ed igl è tut verd.»
Dapli naiv chaschuna pli bler accidents
En las regiuns ch'han dapli naiv, sco per exempel a Tavau, hai dà dapli u almain tuttina blers accidents sin pista sur ils dis da festa. Il schefmedi da la chirurgia a Tavau, Hans-Curt Frei, di ch'els hajan mintg'onn avunda da far.
Era en l'ospital a Scuol vesi ora sumegliant. Tenor Alexander Kerber da l'ospital a Scuol han els gì 145 cas tranter Nadal ed ils 5 da schaner. Quai sajan mo 6 dapli che l'onn passà. Tuttina è insatge dà en egl ad el.
Nus avain autras blessuras per quai temps da l'onn.
Las blessuras èn per exempel blessuras al chau da la stgaina gest sut il schanugl, blessuras da lioms el schanugl ni persunas che han rut l’oss dal ventrigl. Da quellas blessuras capitan normalmain per ella naiv da primavaira. Quai vegnia da la consistenza da la naiv. La damaun èsi plitost dir ed il suentermezdi vegni lom.
Pli pauc accidents da sport d'enviern per l'ospital chantunal
En l'ospital chantunal a Cuira hai dà tuttina blers cas da blessuras sco l'onn passà. Tranter Nadal e Bumaun èn quai stà radund 200 cas. Tschai onn èn la mesadad da quai stà accidents da pista. Quest onn èsi mo in terz.
Pia tut tenor lieu hai dà medem blers u schizunt pli paucs accidents. Las blessuras che capitan normalmain plitost la fin da la stagiun, capitan gia ussa.