Cun l'ovra idraulica planisada vegniss la producziun d'electricitad en il Partenz dublegiada. Quest project n'è dentant ditg betg stà in tema perquai ch'ils pretschs d'energia sajan stads memia bass per ch'i avess rendì economicamain. Quai saja uss dentant auter, sco il commember da la direcziun Michael Roth di:
Las concessiuns da las vischnancas involvidas èn avant maun. Per survegnir la lubientscha dal chantun Grischun, sto la Repower anc furnir dapli infurmaziuns.
La Repower fa uss perquai ils proxims pass. Actualmain vegn examinà co ins pudess optimar il tunnel d'aua che duai manar da Küblis a Trimmis e procurar per electricitad per bun 50'000 chasadas. Sur Fideris prenda la Repower provas che duain mussar sch'i fiss era pussibel che la lingia va directamain là atras. Quai reduciss lura era gist ils custs da l'entir project. Per sclerir ils proxims pass ha la Repower investì 10 milliuns.
I saja da quintar ch’il chantun termineschia l’onn proxim la procedura per approvar la concessiun, ha ditg Roth. Sinaquai veglia la Repower lura inoltrar la dumonda da bajegiar, perquai tschertga l'interpresa uss in biro d'inschigneria per las lavurs preparatoricas.
Il pli baud en otg onns pudess l'ovra idraulica Chlus cumenzar a producir energia. La Repower quinta cun custs da radund 400 milliuns francs. Radund 60% dals custs pudessan vegnir cuvrids tras subvenziuns perquai che l'ovra idraulica vegn promovida cun la strategia d'energia 2050. Er il chantun Grischun vesa l'ovra sco project impurtant, di la ministra d'energia grischuna, Carmelia Maissen:
Quest project è fitg impurtant per il chantun Grischun. Betg exnum per noss agen provediment d'energia, mabain èsi in'impurtanta contribuziun per auzar la producziun d'energia regenerabla. Jau crai er ch'i ègl in impurtant signal en quest temp. Per mussar che la forza idraulica è anc adina in'interessanta tecnologia.