Cun l'ovra idraulica planisada vegniss la producziun d'electricitad en il Partenz dublegiada. Quest project n'è dentant ditg betg stà in tema perquai ch'ils pretsch d'energia sajan stads memia bass per ch'i avess rendì economicamain. Quai saja uss dentant auter, sco il commember da la direcziun Michael Roth di:
Las concessiuns da las vischnancas involvidas èn avant maun. Per survegnir la lubientscha dal chantun Grischun, sto la Repower anc furnir dapli infurmaziuns. I saja da quintar ch’il chantun termineschia l’onn proxim la procedura per approvar la concessiun, ha ditg Roth. Sinaquai veglia la Repower lura inoltrar la dumonda da bajegiar, perquai tschertga l'interpresa uss in biro d'inschigneria per las lavurs preparatoricas.
Il pli baud en 8 onns pudess l'ovra idraulica Chlus cumenzar a producir energia. La Repower quinta cun custs da radund 500 milliuns francs. Radund 60% dals custs pudessan vegnir cuvritgs entras subvenziuns perquai che l'ovra idraulica vegn promovida cun la strategia d'energia 2050.
