L'implant solar da Tavau ch'è planisà en la regiun da Parsenn è in pass vinavant. Tenor infurmaziuns da la vischnanca da Tavau n'haja dà nagins recurs cunter il project. Sco proxim sto la regenza grischuna anc approvar la dumonda da bajegiar per implants ed indrizs ordaifer la zona da construcziun.
Tavau di Gea ad ovra solara
Ils 17 da december 2023 ha la populaziun da Tavau ditg Gea a l'ovra solara sin il territori da Parsenn. Tar la votaziun a l'urna han 74% sustegnì il project che prevesa ina producziun da 10 uras gigawatt l'onn, u radund 2'000 chasadas. Il parlament aveva gia approvà il project ils 3 da november.
La populaziun ha per l'ina decis da surdar il dretg da bajegiar al consorzi, per 40 onns, cun la pussaivladad da prolungar per ulteriurs 40 onns. Plinavant prevesa in contract preliminar che la vischnanca survegn mintg'onn ina pauschala da 2'000 francs per hectara surbajegiada, dentant almain 28'000 francs – plus ina indemnisaziun variabla che dependa dal success economic dal project. Tenor indicaziuns da la vischnanca possia quella indemnisaziun muntar a fin 250'000 francs.
La vischnanca ha plinavant il dretg da retrair fin a 1'000 MWh electricitad da l'ovra, per in pretsch spezial. Plinavant pudess la vischnanca sa participar vi da l'ovra sezza, quai cun maximalmain 10% da l'interpresa. Sche quella pussaivladad vegn nizzegiada n'è dentant anc betg cler. Tut tenor stuess ina tala decisiun vegnir lubida dal parlament communal u da la populaziun.
Il project
Quatter ovras electricas – las Ovras electricas Tavau, Ovras industrialas Basilea, Energia Aua Berna e l'Energia Thun SA – vulan realisar in'ovra da fotovoltaica sin il areal da la «Totalp», a la costa sid dal Totalphorn. Sco la vischnanca scriva en il messadi per la votaziun, vegnia quest territori gia nizzegia per il turissem, cun infrastructura correspundenta. Plinavant na vesian ins betg quest territori davent da la val.
Il project ha:
- ina surfatscha da 110'000 fin a 140'000 m²
- radund 17'800 panels solars
- producescha 10-12 GWh ad onn
- è sin 2300 fin 2500 meters sur mar
- custa 35-40 milliuns francs
- è en funcziun il december 2025 (dapli che 10%)
- è cumplainamain en funcziun il 2028
Survista Svizra
