Almain trais giadas per di guarda Anastasia Cajacob da sia sira ch'abitescha en il medem quartier sco ella. Damai che la dunna da 87 onns na pudess betg pli abitar persula, dovra ella bler sustegn ed accumpagnament.
Dapli temp per la sira
Avant passa in onn è Anastasia Cajacob da Sumvitg sa decidida da chalar sia lavur en l'Instituziun per persunas cun impediment e da tgirar dapli sia sira. Avant lavurava ella - per motivs da mancanza da persunal - bunamain 100 pertschient e guardava dasperas anc da la mamma da ses um.
Nus vulevan ch'ella possia restar vinavant a chasa e betg stuair ir en la chasa da vegls. Cunzunt pervia da la situaziun da corona na savevan nus betg tge che spetgi ella – ed era nus – là.
La Spitex sa gida
I saja dentant stà impurtant ch'ella na surprendia betg persula quell'incumbensa pretensiusa. Perquai survegn ella agid da la Spitex e mintga duas emnas era da sia quinada. In pitschen pensum saja ella emploiada tar la Spitex ed il rest saja ina cunvegnientscha tranter la sira ed ella, di Anastasia Cajacob.
Guardar da l'atgna sanadad
La midada davent l'Instituziun per persunas cun impediment tar la tgira a chasa haja era purtà intginas sfidas. Ins n'haja betg in team ch'ins possia sa barattar, di la dunna da 55 onns. Perquai saja impurtant dad avair ina buna relaziun cun amis ed amias en il temp privat. Era Anastasia Cajacob sentia che la lavur pretendia mintgatant blera energia. Alura saja impurtant d'enconuscher ils agens cunfins e da guardar per l'atgna sanadad. Quai fa ella cun ir a spass en la natira u far in'excursiun.