Siglir tar il cuntegn

Header

cuntegn

Partenz Bloccar sortidas d'autostrada per far frunt al traffic da Nadal

L'Uffizi da construcziun bassa grischun vul far in'emprova da pilot per cumbatter il traffic da Nadal en il Partenz e la regiun da Cuira. Pliras sortidas da la A13 e la A28 duain vegnir bloccadas temporarmain.

Il chantun quinta la stagiun d'enviern – surtut però sur Nadal e Bumaun – cun dapli traffic da vacanzas en las regiuns turisticas. En spezial la dumengia saira, cura che blers turists e turistas turnan da lur vacanzas, fa il chantun quint cun lungas colonnas dad autos en il Partenz ed enturn Cuira.

Per evitar u almain minimar las stagnaziuns ha l'Uffizi da construcziun bassa dal Grischun elavurà in concept che sa basa sin differents scenaris. Planisà sco emprova da pilot saja da bloccar tschertas sortidas da las vias naziunalas A13 ed A28, communitgescha il chantun.

audio
Traffic da guntgida per l'enviern
ord Actualitad dals 20.12.2022. Maletg: RTR
laschar ir. Durada: 3 minutas 22 Secundas.

Tegnair liber zonas d'abitar e laschar fluir il traffic

Il focus saja surtut sin vitgs dal Partenz dadora. Là duain vegnir serradas las sortidas da

  • Jenaz,
  • Schiers,
  • Seewis e
  • Ganda.

Per minimar il traffic tras Zizers e Landquart duain er là vegnir serradas sortidas sco quella da

  • Rappagugg tar Zizers.

La finamira da las mesiras saja en emprima lingia da tegnair liber las zonas d'abitadi dal traffic da transit, da garantir la circulaziun sin las vias e da garantir ch'il traffic public possia girar tenor urari. Tenor il manader da l’Uffizi da construcziun bassa, Reto Knuchel, è la finamira dal project da pilot cuntanschida sch'il trafic na va betg tras las vischnancas e sch'il trafic rodla..

Las bloccadas sajan pussaivlas, communitgescha il chantun, perquai ch'ils vitgs hajan pliras sortidas. Uschia saja l'access era garantì a la populaziun locala sche tschertas sortidas sajan bloccadas.

Or da l'archiv

video
In di da nar – 24 uras al Vereina
Or da Cuntrasts dals 10.04.2022.
laschar ir. Durada: 27 minutas.

RTR novitads 09:00

Artitgels legids il pli savens

Scrollar a sanestra Scrollar a dretga