La gronda part da la valurisaziun or dal turissem vegn sco er en il rest dal chantun generada indirectamain entras il sectur da construcziun u il commerzi en detagl – quai cun 84%. Uschia profiteschan era numerus manaschis ordaifer ils centers turistics sco Tavau e Claustra dad incumbensas ch'els survegnan da manaschis u da giasts. Impurtant sajan qua ils possessurs d'abitaziuns che dettian ora mintg'onn en media 12'400 francs per lur abitaziun.
Era pernottaziuns en abitaziuns, mises e giasts dal di èn vegnids analisads
Il studi analisescha per l'emprima giada era las pernottaziuns betg mo en ils hotels, mabain er en abitaziuns da vacanzas u mises, sco er ils giasts dal di. La regiun Partez/Tavau vegn uschia sin passa 4,3 milliuns giasts l'onn – prest in milliun da quels èn giasts dal di.
Sch'ins tira giu da quai las cifras da la destinaziun Tavau Claustra (tranter auter las vischnancas da Tavau, Claustra e Küblis) vegnan registrads en las ulteriuras vischnancas dal Partenz anc adina stgars in milliun giasts per onn. Quai è bler dapli che quai ch'ins ha supponì enfin ussa. Radund 600'000 pernottaziuns han lieu en il Partenz en atgnas abitaziuns da vacanzas, tar parents ed enconuschents ed en l'ulteriura parahotellaria. Aut è la cumpart dals giasts dal di (34%) en il Partenz, a Tavau Claustra è questa valur tar 18%.
Partenz/Tavau contribuescha ina part impurtanta al turissem
Las cifras dal studi davart la valurisaziun turistica en il Grischun, ch'è vegnì fatg per incumbensa dal chantun, èn impressiunantas: var 4 milliardas francs valurisaziun brutta e 19 milliuns pernottaziuns per onn vegnan cumprovadas, 33'000 plazzas cumplainas vegnan dumbradas en l'entir chantun. La regiun Partenz/Tavau contribuescha ina part impurtanta cun ina valur agiuntada brutta da 590 milliuns francs, 3,23 milliuns pernottaziuns turisticas e 4'865 da 12'755 plazzas che vegnan attribuidas al turissem.
