Beatrice Baselgia surpiglia il timun da la fracziun socialdemocratica en il Cussegl grond. La deputada da Domat haja ina gronda experientscha politica e saja vegnida elegida unanimamain, scriva la Partida socialdemocratica dal Grischun.
Il schef da fracziun d'enfin uss – Lukas Horrer – n'è betg vegnì reelegì sco deputà da Cuira. Perquai ha la PS stuì tscherner in nov presidi.
Fracziun cotschen-verda
La fracziun da la PS ha medemamain decis d'integrar en lur retschas ils dus novs deputads da la Partida verda. Uschia dumbra la fracziun en tut 27 deputadas e deputads. Gia en il cumbat per las elecziuns dal matg passà avevan ils socialdemocrats ed ils verds unì lur forzas.
Nova legislatura – bleras midadas
Er las ulteriuras partidas grischunas han tegnì quels dis lur sesidas per sa preparar sin la nova legislatura dal Cussegl grond che cumenza ils 31 d'avust. Sper las preparativas tematicas vai er per nominar deputadas e deputads en cumissiuns e furmar las fracziuns.
- Da nov furma la Partida verd-liberala ina fracziun, cunquai ch'ella dumbra set deputadas e deputads. Presidiada vegn quella da Jürg Kappeler da Cuira.
- La fracziun cun il pli grond augment da persunal è la PPS – ella vegn manada da Walter Grass dad Urmein.
- L'Allianza dal Center nominescha Franz Sepp Caluori sco vicepresident dal Cussegl grond. Il presidi da la pli gronda fracziun dal Cussegl grond partan vinavant Martin Bettinaglio da la Partenza e Reto Crameri da Surava.
- Il pli aut Grischun daventa l'emna proxima Tarzisius Caviezel. Naginas midadas da persunal èsi previs per la fracziun liberaldemocratica: Vera Stifler da Cuira resta presidenta.
Las elecziuns dals 15 da matg han midà las fermezzas da las partidas en il Cussegl grond: