Al di da partida han ils socialdemocrats e las socialdemocratas dal Grischun elegì la sonda unanimamain Julia Müller sco nova presidenta. La giuvna politicra da Favugn succeda ad Andri Perl ch'è stà trais onns en uffizi. Julia Müller è giurista e dapi il 2018 deputada da la regiun Plaun en il Cussegl grond. Gia dapi quatter onns è ella stada vicepresidenta da la partida socialdemocratica.
La gronda finamira da la nova presidenta entaifer la partida saja da rinforzar las regiuns en il chantun. Quest potenzial saja creschì era grazia al nov sistem d'eleger. Tematicamain sajan ils accents cleramain la politica dal spazi d'abitar che stoppia vegnir en il center mo er la politica dal clima cun la segunda etappa dal «Green-Deal» vegnia a vegnir fitg impurtanta.
Sco vicepresident da la PS Grischun ha il di da partida elegì Lukas Horrer. El è anteriur president da fracziun da la partida. Avant aveva el manà plirs onns il secretariat da partida da la PS Grischun.