La Giuvna Partida cristiandemocratica dal Grischun e la Giuvna Partida burgais-democratica dal Grischun s’uneschan. En futur vulan las duas partidas sa preschentar sut il num «Il Center Giuven Grischun». Quai han las duas partidas annunzià la dumengia en ina communicaziun communabla.
Ina gruppa da lavur haja elavurà in contract da fusiun sco er ils statuts per la nova partida. Ils 18 da zercladur duain ils commembers e las commembras da las duas partidas giuvnas decider definitivamain e quai a chaschun da las ultimas radunanzas dad omaduas partidas respectiv a la radunanza da fundaziun da la partida nova.
Las suprastanzas da las duas partidas mamma, la PCD Grischun e la PBD Grischun han gia suttascrit in contract da fusiun. Là croda la decisiun definitiva ils 7 da zercladur.
