Radund 70 cas da virustgel hai enfin uss dà en l'entira Svizra. En il chantun Grischun hai be dà tschintg cas – e quels tuts il schaner. Quai ha ditg il medi chantunal Martin Mani sin dumonda da RTR.
Il virustgel è ina malsogna incalculabla
Daco che quai saja uschia, è tenor Mani grev da dir. Sche la malsogna rumpia ora insanua, sche saja fitg grev per ils medis da tegnair ella sut controlla. Il sulet med che funcziunia, saja la virola. E la finamira principala è dad eliminar la malsogna sin l’entir mund. Quai cun virolar uschè bleras persunas sco pussaivel, di il medi chantunal.
Virola per eliminar il virustgel – Datiers da la finamira
Cun ina quota da persunas viroladas da sur 95%, dastgian ins sperar d'avair dumagnà la malsogna. La quota en Svizra è datiers da quests 95% tar uffants fin a 16 onns, di Mani. La quota tar persunas creschidas na vegnian betg registradas.
RR actualitad 12:00
