Siglir tar il cuntegn

Header

cuntegn

Pendicularas d'Arosa Accusaziun suenter avair regalà abunaments a politichers

Gia decennis regalan las pendicularas d’Arosa a politicras e politichers locals il abunament da stagiun. Quella pratica era vegnida enconuschenta avant bain dus onns. Sin quai è la procura publica vegnida activa ed ha avert l’atun passà in’inquisiziun penala encunter las pendicularas d'Arosa.

Uss è quella inquisiziun penala terminada, sco in pledader da la procura publica ha ditg sin dumonda dal schurnal regiunal dad SRF. Or da quella inquisiziun resulta ina accusaziun pervi da pliras concessiuns d'avantatg. En ils proxims dis vegnia quella tramessa a la dretgira regiunala Plessur ch'è responsabla per il cas. Uschia ston pia il president dal cussegl d'administraziun, Lorenzo Schmid, ed il mainagestiun, Philipp Holenstein, sa giustifitgar avant dretgira. Per quest delict è en il cudesch da dretg penal previs in chasti che va dad ina multa fin tar trais onns praschun. Per ils dus accusads vala la presumziun d'innocenza.

Il president dal cussegl d'administraziun Lorenzo Schmid aveva accentuà che quai tut saja stà correct. Las pendicularas Arosa avevan er l'ultima stagiun puspè offrì a tschertas persunas abunaments gratuits.

Er encunter quels e quellas ch'hajan profità dals abunaments gratuits dettia ina procedura penala da la procura penala publica. Qua sa tractia d'ina acceptaziun d'in avantatg. Quell'examinaziun na saja anc betg terminada.

Pendicularas regalan abunaments gia dapi decennis

Dapi 58 onns regalan las pendicularas d'Arosa abunaments da stagiun en valur da 550 francs a politicras e politichers locals. Questa pratica era vegnida publica avant bun dus onns en la gasetta Südostschweiz. Quai suenter ch'in parlamentari aveva crititgà la pratica da regalar abunaments. Sin quai è la procura publica vegnida activa, perquai che daquels regals pudessan esser in'emprova illegala d'intimaziun – concessiun d'in avantatg sa numna il delict en il cudesch da dretg penal. L'atun passà ha la procura publica avert in'inquisiziun penala encunter il president dal cussegl d'administraziun Lorenzo Schmid ed il mainagestiun Philipp Holenstein.

audio
Per tadlar: curt e cumpact
ord RTR Audio dals 28.03.2023.
laschar ir. Durada: 1 minuta 21 Secundas.

RTR novitads 17:00

Artitgels legids il pli savens