Cun las pendicularas grischunas vai actualmain bain. En general saja la branscha sa revegnida: Suenter che la Banca naziunala haja schlià il curs minimal da l'euro vers il franc, saja quai ì mo ensi – cun excepziun dals onns da corona, ha ditg il president da l'uniun Pendicularas grischunas Markus Moser a la radunanza generala. Era che pli e pli blers Svizzers e Svizras restian en Svizra en las vacanzas haja gidà.
Enviern passà è stà il meglier dapi 15 onns
La stagiun d'enviern passada saja stada fitg buna, schizunt la megliera dapi 15 onns. E las premissas per la stagiun avant escha sajan bunas: Temperaturas bassas per ennevar e sin ils auts gia avunda naiv, hai gì num a la radunanza generala. Mo l'aura stoppia ussa anc furnir dapli naiv.
Pendicularas pateschan da birocrazia
I na saja però betg da far pauss sin las arbajas: Guardà a lunga vista hajan ils custs dentant prendì tiers surproporziunalmain – quai tar entradas stabla. Uschia possian las pendicularas investir pli e pli pauc. L'uniun giavischa perquai era main squitsch regulatoric e dapli schliaziuns aifer la branscha. Surtut saja la birocrazia memia gronda: las lavurs administrativas sajan creschidas.