Siglir tar il cuntegn

Header

cuntegn

Pernottaziuns enviern Ils giasts han puspè fatg pli savens vacanzas en il Grischun

En tut ha il chantun dumbrà passa 2,9 milliuns pernottaziuns tranter il november 2021 e l'avrigl 2022. Quai è prest in terz dapli pernottaziuns che l'onn avant. Sco la statistica da l'Uffizi chantunal per economia e turissem mussa, han Cuira e la Bregaglia gì il pli grond augment. Omaduas destinaziuns han gì pli che dubel uschè bleras pernottaziuns sco en la davosa stagiun. Il resultat n'è betg mo bun, cumpareglià cun la davosa stagiun durant la pandemia, mabain era en media dals davos 5 onns èn las pernottaziuns s'augmentadas per 15,8%.

Ils pli blers osps èn vegnids da la Svizra. Dentant è er il dumber d'osps da la Germania e l'Italia sa dublegià l'enviern passà. Perquai ch'i ha dà pli paucas restricziuns da corona che la stagiun dal 2020/21, han puspè dapli persunas pudì viagiar en Svizra.

L'avrigl èn las cifras stadas stabilas

Las cifras da l'avrigl da quest onn guardan dentant or auter che quellas da l'entira stagiun. Fertant che prest tuttas destinaziuns han nudà dapli pernottaziuns sur lezza, mussà l'avrigl en prest la mesadad da las destinaziuns in minus. Cumpareglià cun la media da tschintg onns, han dentant tuttas destinaziuns grischunas pudì nudar dapli pernottaziuns er l'avrigl.

Total ha il Grischun nudà 221'119 pernottaziuns durant l'avrigl. L'onn passà eran quai 215'858. Total è il dumber da pernottaziuns pia restà pulit stabil durant quest avrigl.

Augment da passa 50% en Svizra

Guardà sin l'entira Svizra hai dà in augment d'osps da passa 50% durant la stagiun d'enviern, sin total 14,6milliuns pernottaziuns, tranter il november 2021 e l'avrigl 2022. Per cuntanscher il nivel d'avant la pandemia mancan anc adina 12%. Er en Svizra è creschì l'enviern passà puspè ferm la dumonda da persunas da l'exteriur (+196,7%). Ma er dapli indigens (+18,9%) han puspè pernottà en Svizra. Cun total 9 milliuns pernottaziuns da Svizras è Svizras, è quai in record. Cumpareglià cun la stagiun d'enviern dal 2019/20 è quai in augment da 39,9%.

audio
Per tadlar curt e cumpact
ord RTR Audio dals 07.06.2022.
laschar ir. Durada: 55 Secundas.

RTR novitads 10:00

Artitgels legids il pli savens