La hotellaria en il Grischun ha nudà l’avust bunamain 654'701 pernottaziuns. Quai saja in minus dad 8,6% cumpareglià cun la medema perioda da l’onn passà, scriva l’Uffizi per economia e turissem dal Grischun sin sia pagina d'internet.
In ferm minus ston tranter auter las destinaziuns da Scuol Samignun Val Müstair (-22,9) e Flem-Laax (-20,8) magunar. Persuenter sa revegn la hotellaria en la citad da Cuira vinavant cun in plus da 10,5%.
Gia il fanadur aveva il Grischun nudà pli paucs giasts en la hotellaria.
Dapli giasts da l'exteriur en Svizra
En l'entira Svizra han ins dumbrà l'avust 4,5 milliuns pernottaziuns – in plus da 7,6% cumpareglià cun l'avust dal 2021.
Surtut giasts da l'exteriur han puspè pernottà en Svizra (+41,5%): Giasts da la Germania ed ils Stadis Unids fan puspè vacanzas en hotels svizzers – entant che persunas da la China e dal Giapun desistan vinavant da viagiar en Svizra.
Il dumber da giasts svizzers è sa reducì per 13,5% l'avust. Quai munta che Svizras e Svizzers nizzegian uss puspè pli savens la pussaivladad da far vacanzas en l'exteriur. Igl è dentant da menziunar ch'il total da 2,2 milliuns pernottaziuns è anc adina per 16% sur la cifra dal 2019 avant la pandemia. Quai mussan las cifras da l'Uffizi federal per statistica.