Persunal da la Viafier retica lavura pli ditg

La direcziun da la Viafier retica e la radunanza generala dal sindicat dal persunal dals transport SEV èn sa cunvegnids sin in nov contract collectiv da lavur. Tranter auter sto il persunal lavurar dapli uras ad onn.

In guardialingia da la Viafier retica è dasperas ils Bild in Lightbox öffnen.

Legenda da maletgs: Las collavuraturas ed ils collavuraturs da la Viafier retica lavuran pli ditg a partir da l'emprim d'avrigl. RTR, F. Belotti

Sco quai che la Viafier retica ha confermà, vegnan las uras da lavur ad onn augmentadas da 2’100 sin 2’106 uras, quai èn stgars 1.5 minutas dapli per di. La Viafier retica vesa quest augment sco cumpensaziun per differents supplements. Tranter auter vegnan augmentads ils supplements per la lavur da la notg e da la dumengia.

Tenor Stefan Engler, il president dal cussegl d’administraziun da la Viafier retica, possian ins spargnar radund 400’000 francs ad onn, cun quai ch’il persunal lavuria pli ditg. «Reducir plazzas da lavur n’è pero betg l’intent da la Viafier retica», ha ditg Stefan Engler.

Be in cumpromiss

Il sindicat dal persunal da transport vegn a suttascriver ils proxims dis il contract collectiv da lavur, ha ditg Peter Peyer, il secretari regiunal dal SEV. L’augment da las uras da lavur saja però mo in cumpromiss pervi dal curs aut da l’euro e la situaziun economica flaivla: «I sa tracta d’ina mesira temporara, uschè spert che la situaziun da la valuta sa mida, alura vulain nus puspè discutar davart las uras da lavur annualas», uschia Peter Peyer. Il sindicat vul a lunga vista sbassar las uras da lavur sut 2’100 uras ad onn.

Il nov contract collectiv da lavur da la Viafier retica vala 4 onns. Sin cunvegnientscha dad omaduas partidas possia quai dar midadas gia entaifer quests 4 onns, ha ditg il secretari regiunal.