Siglir tar il cuntegn

Header

Patric Maissen en sia pratica a Breil.
Legenda: Il medi da chasa Patric Maissen maina dapi 2 onns ina pratica a Breil. RTR, G. Gabriel
cuntegn

Grischun Pertge mancan ils medis da chasa?

La mancanza da medis da chasa è in problem ch'occupa gia dapi onns la Svizra ed oravant tut las regiuns periferas. Patric Maissen ha dapi radund dus onns in atgna pratica da medi a Breil. El è in dals paucs students da medischina ch'è sa decis da daventar medi da chasa.

Tge èn ord sia vista ils motivs per la mancanza da medis da chasa e tge ènpussaivlas mesiras?

Apparat da mesirar la pressiun.
Legenda: Sut pressiun: Medis da chasa ston surpigliar bler dapli responsabladad. Keystone

Grondas investiziuns per in medi giuven

Avrir in' atgna pratica da medi saja adina collià cun investiziuns. Per in medi giuven che na disponia betg da grondas reservas finanzialas, saja quai betg uschè simpel, declera Patric Maissen. «L'entschatta fan las summas schon in pau curius e na lain forsa betg adina durmir.» Cun il temp vesian ins dentant ch'i giaja schon insaco. Cura ch'ins haja ina giada decis da surpigliar u avrir ina pratica saja il pass enavos gist per giuvens medis fitg difficil.

In ulteriur motiv per la mancanza da medis da chasa è tenor Maissen ch'i dat memia paucs students da medischina. Er la responsabladad ch'ins surpiglia sco medi da chasa vegn savens numnada sco raschun che medis giuvens prefereschian da lavurar en l’ospital. Entant ch'ins stoppia sco medi da chasa prender sulet las decisiuns, sajan ins en l’ospital adina part d' in collectiv, explitgescha il bab da famiglia. «Jau sez hai dentant adina puspè contact cun auters medis da chasa ed er cun ils medis en l’ospital.»

La preschientscha durant ils servetschs è in punct, daco ch'ins ha problems da chattar giuvens medis da chasa.
Autur: Patric Maissenmedi da chasa a Breil

Vacanzas betg pajadas

Adina puspè punct da discussiun èn las pajas dals medis da chasa. Il uschenumnads puncts da taxa chantunals per ils medis da chasa na sajan betg ils medems sco per ils spezialists en ospital, declera Maissen. Er pertutgant las vacanzas dettia differenzas tranter medi da chasa ed medi en l’ospital: «En quai mument ch'ins fa vacanzas sco medi da chasa, gudogna ins nagut. Sco medi en l’ospital han ins dentant vacanzas ch'èn pajadas. Las finanzas duessan dentant betg esser la motivaziun per far la lavur.»

Paucs medis ston cuvrir blers servetschs

Il pli grond problem èn ord vista dal medi da 37 onns ils temp da lavur: «La preschientscha durant ils servetschs è in punct, daco ch'ins ha problems da chattar giuvens medis da chasa.» En l’ospital vegnian ils servetschs partids tranter ils medis. Cura ch'il medi da l’ospital haja liber, haja el propi liber. Er tar ils medis da chasa vegnian ils servetschs partids si. «In medi da chasa ha dentant tuttina insaco l'obligaziun dad esser qua per il pazient. Il pazient spetga gie er ch'el po tiers il medi da chasa», explitgescha el. Paucs medis hajan da cuvrir blers servetschs. Quai saja il problem che stuess vegnir schlià.

Nova purschida - ospital surpiglia cas da bagatella

En la regiun da servetsch da la Surselva dettia dapi quest onn ina nova purschida. «Ils medis da chasa han a partir da las otg la saira la pussaivladad da colliar lur numer cun quel dal medi en l’ospital». Quel sappia lura surpigliar ils cas da bagatella. Quai saja in pass per far pli attractiv la clamada dal medi da chasa. In recept encunter la mancanza da medis da chasa ha il medi sez dentant er betg.

Artitgels legids il pli savens

Ir a sanester Ir a dretg