Il comité «RSO, ds Radio vu do bliibt do» ha surdà a la Confederaziun sia petiziun per salvar il Radio Südostschweiz cun 12'907 suttascripziuns. La petiziun pretenda che la decsiun da concessiun per il Grischun e la Glaruna, prendida il schaner da quest onn, duai vegnir curregida. Cun questa decisiun aveva il Radio Südostschweiz da la gruppa da Somedia pers la concessiun per il 2025 ad in nov emettur da radio da l'interpresa da medias da Roger Schawinsi.
Grond sustegn per «ds Radio vu do»
Il comité haja rimnà suttascripziuns cunter questa decisiun dapi il schaner. Bleras persunas en ils chantuns Grischun, Glaruna e Son Gagl veglian che la decisiun per la concessiun per ils onns 2025 fin 2034 vegnia reponderada, scriva il comité en ina communicaziun.
La gruppa da Somedia ha pers la concessiun per ses emettur da radio suenter 35 onns. L'Uffizi federal da communicaziun aveva favurisà la candidaura che Roger Schawinski aveva innoltrà sut il num Radio Alpin.
La discussiun davart il num
La fin d'avrigl aveva Schawinski entant declerà da vulair midar il num da ses nov radio: Or da Radio Alpin duai dar Radio Grischa. Uschia aveva però precis il Radio Südostschweiz num fin l'onn 2015. Tenor il president dal cussegl d'administraziun da la gruppa da Somedia, Silvio Lebrument, n'haja Schawinski entant nagina basa per ses agir. Tgi che dastga la finala duvrar u salvar il num Radio Grischa ston ussa dretgiras decider.
