Sco la polizia chantunala communitgescha è in um da 60 onns vegnì curt suenter las 21:00 dal sid sin l'A13 en direcziun San Bernardino. En il tunnel Brusei è el ì sur la lingia or ed è collidà da la vart cun in automobilist dal Tessin da 58 onns ch'era sin viadi cun sia figlia encunter il sid. L'automobilist da 27 onns ch'era davostiers n'ha betg pli pudì franar ed è collidà cun il Tessinaus. L'auto da l'um da 60 onns ha lura piglià fieu.
Sco emprim han ils pumpiers stuì survegnir sut controlla las flommas. Pir lura han duas equipas da l'ambulanza pudì ir al lieu. Total èn quatter persunas vegnidas blessadas: il manischunz da l'auto ch'ha brischà grev, ina cunautista è vegnida blessada mez grev. Ils dus auters umens han stuì ir en l'ospital pervi d'ina tissientada da fim supponida.
Per tschintg uras era il tunnel dal San Bernardino stà serrà e l'entir traffic ha stuì sviar sin la via chantunala H13 e sur il pass.