La giustia grischuna ha da sa fatschentar cun in pirat da la via, ch'è charrà cun 303 kilometers l'ura tras ina controlla sin l'autostrada A13. Il cas è capità ils 27 da settember 2022. Nua exact ch'el è vegnì traplà n'è betg enconuschent. Cler è dentant ch'el saja stà en viadi vers sid suenter in tunnel e betg en la Mesolcina, uschia la RSI. Or da questas infurmaziuns pudess ins trair la conclusiun, ch'el era en viadi tras la Tumleastga suenter il tunnel dad Isla bella.
12 mais en praschun
L'automobilist sto quintar da stuair ir en praschun per passa 12 mais e vitiers laschar far in test da DNA. Cunter questa mesira da la Procura publica haja l'um fatg recurs, sco l'emettur RSI rapporta. La fin da zercladur ha la Dretgira chantunala lura refusà il recurs. Ella argumentescha, che l'um pudess pli baud u pli tard puspè repeter ses surpassaments.