Intgins placats svaneschan, intgins èn stgarpads e sin auters ha in politicher u ina politicra tuttenina in barbis u dents nairs. Il vandalissem è dentant per gronda part en il rom d'auters onns d'elecziun. Quai conferman ils presidents e las presidentas da partida: Kevin Brunold (AdC), Roman Hug (PPS), Anita Mazzetta da la Verda e Geraldine Danuser da la Partida verd-liberala. Sulettamain ils liberaldemocrats paran da resentir nagut dal vandalissem tar lur placats electorals, uschia il president da partida, Bruno Claus.
In zic auter è la situaziun stada quest onn tar la Partida socialdemocratica. Els han quest onn annunzià cas a la polizia, perquai ch'igl è vegnì malegià simbols naziunalsocialistics sin lur placats electorals. Normalmain n'avessan els betg prendì talas mesiras, uschia il president da la partida Andri Perl. Ma quai han els era fatg per mussar nagina toleranza envers tals simbols e per dar in signal.
En general saja il problem survesaivel. Per il solit vegnian ils placats demolids simplamain remplazzads. Deplorabel èsi tenor ils presidents e las presidentas da las partidas dentant tuttina. Ils placats custian numnadamain, ed i duai avair en ina democrazia avunda plaz per tut las opiniuns, uschia il tenor.
