Roger Rudolph, professer da dretg da lavur a l'Universitad da Turitg, di tranter auter ch'i saja grev da giuditgar, sch'ils quatter emploiads ed emploiadas han propi violà la obligaziun da fidaivladad cun sa participar al protest da l'Unia. Tge che saja dentant segir: Il dretg pretendia raschuns relevantas per ch'i saja giustifitgà da visar la plazza ad insatgi per immediat.
Tge pon ils pertutgads e las pertutgadas far, sch'els na vulan betg acceptar l'agir dal patrun?
Els possian pretender diversas indemnisaziuns, di Roger Rudolph: Per l'ina ina cumpensaziun da paja per il temp da disdItga che n'è betg vegnì risguardà, per l'autra in pajament da chasti da maximal 6 pajas mensilas. Survegnir enavos la plazza, gliez na na survegnian els perquai tuttina betg. Cun la visada fineschia il contract da lavur, sche quella saja ussa stada giustifitgada u betg.
Tge di el areguard la visada immediata da las chombras da persunal?
Era qua pon ins argumentar da duas varts. Da la vart dal dretg da lavur (en quai cass a favur da Roberto Giovanoli e sia fatschenta Plan-B Kitchen), u da la vart dal dretg da locaziun (en quest cass a favur dals emploiads e da las emploiadas). Sch'i vala avant dretgira il dretg da locaziun, na pon ins betg simplamain visar l'alloschi sut quellas circumstanzas. Sch'i vala dentant il dretg da lavur, lura scada il contract da locaziun era, cura ch'il contract da lavur scada.
En tge direcziun po il cas sa sviluppar?
Il sindicat Unia scriva en sia communicaziun ch'els sajan vid preparar in plant pervi da las disditgas ch'èn tenor els nunlubidas, ed els vegnian a sustegnair ils anteriurs emploiads ed emploiadas avant dretgira.
Tenor Roger Rudolph possian quels e quellas lura contestar la disditga immediata e pretender ina cumpensaziun da paja ed in pajament da chasti. Pervia da las chombras da persunal vegnissan els ad argumentar cun il dretg da locaziun. Quel di ch'ins na dastga sut quellas circumstanzas betg visar l'alloschi per immediat. Il professer da dretg di ch'i possia dentant era esser che las duas partidas sa chattan ordaifer la dretgira.