Siglir tar il cuntegn

Header

audio
Gia vis? L'ura da sulegl cun 2 temps e data sin l'Arcas
Or da Actualitad dals 13.08.2021.
laschar ir. Durada: 03:02 minutas.
cuntegn

Plazza Arcas Cuira In'ura da sulegl cun dus temps e data

Cun l'expert dad uras da sulegl Claudio Abächerli avain nus visità in'ura tut speziala. Ella è sin il plaz da l'Arcas en la citad veglia da Cuira. Betg mo las uras, mabain era la data po ella inditgar.

L'ura da sulegl sin la plazza Arcas è vegnida construida l'onn 1982. Ella saja fetg moderna, di l'amatur d'astronomia Claudio Abächerli. L'ura mussa il temp però mo tranter las 12:00 e las 20:00. Quai perquai ch'il sulegl traglischa pir davent da mezdi la fassada ch'è drizzada en direcziun vest.

Las atgnadads da l'ura: 2 temps e la data

Las bleras uras da sulegl inditgeschian il temp local, di Claudio Abächerli che abitescha en il Vallais en ha ragischs en il Mesauc. Auter è quai tar quest'ura: Ella mussa era il temp europeic central. Vul dir: il temp che nus vesain sin l'ura da bratsch u il telefonin. Sulettamain, cura ch'igl è mezdi, inditgescha il pendel mellen malegià vid la paraid anc las uras localas. Quai munta en il cas da Cuira circa las 12:22.

Il pendel malegià vid la paraid mussa il temp local da Cuira
Legenda: Il pendel malegià vid la paraid mussa il temp local da Cuira Cura che l'ura mussa las 12:00 inditgescha il pendel mellen il temp local da Cuira: circa las 12:22. Quai perquai che Cuira sa chatta en il vest dal meridian ed il sulegl dovra circa 22 minutas enfin ch'el cuntanscha il pli aut punct sur Cuira. mad

Betg mo 2 temps – era la data

Il rudè ch'è da la vart dretga da l'ura mussa en cifras romanas ils mais schaner enfin december. Sin la lantschetta sa chattan duas cullas che na tutgan dentant betg l'ina l'autra.

L'ura da sulegl inditgescha era la data
Legenda: L'ura da sulegl inditgescha era la data Cun agid dal rudè blau, las lingias finas nairas e la sfessa tranter las cullas da la lantschetta chatt'ins la data. mad

Las lingias finas e nairas inditgeschan la midada dal mais e quai capita adina il 23avel di dal mais (lu mida era l'ensaina). Sco la fotografia sura mussa, inditgescha la segunda lingia naira da sut ensi il mais 5 (pia il matg) ed il mais 7 (pia il fanadur). La sumbriva da la sfessa tranter quellas duas cullas sa chatta in pau pli aut che la segunda lingia naira da sut ensi (fotografia sut). Quai munta che nus essan circa 10 dis davent dals 23 da fanadur e quai constat uschia circa cun ils 5 d'avust.

La sumbriva da las cullas sin la lantschetta
Legenda: La sumbriva da las cullas sin la lantschetta La sumbriva da la sfessa tranter las duas cullas inditgescha la data. La sumbriva sa chatta in zic sur la segunda lingia da sut ensi. Uschia constati cun ils 5 d'avust. mad

RTR actualitad 07:00

Artitgels legids il pli savens

Scrollar a sanestra Scrollar a dretga