Jonas Baumann. 28 onns, creschì si a Lon ed: In dals megliers passlunghists svizzers. Gia sis giadas è el stà sut ils megliers diesch en la cuppa mundiala. El ha gì ina buna stagiun 2016/2017 cun success al campiunadi mundial a Lahti. Ad el sez munta quai durant quel temp dentant nagut. El na senta nagut; nagin plaschair – nagin frust.
Als campiunadis svizzers il mars tira el lura il stritg sut la stagiun. El interrumpa la cursa e banduna la loipa.
Betg mo in pau stress
L’emprim ha el il sentiment ch’el dovra sulet ina pausa. El s’accorscha dentant spert: Mo far pausa na porta nagut. Plaun ma segir è cler: Jonas Baumann ha ina depressiun da spussada. Vul dir: Nagin elan, nagina motivaziun – tut para simplamain dad esser «grisch».
La malsegirezza, sche quella situaziun resta uschia e sche quai vegn ad esser la fin da sia carriera – temas ch’èn plitost in tabu en la scena da sport.
Jonas Baumann chatta dentant – cun l’agid da sia amia – il curaschi da discurrer sur da ses problems e da dumandar per agid. El fa ina terapia e survegn medicaments natirals. Il tractament ha success: Suenter in pèr mais vegn plaunsieu puspè enavos il plaschair vid il sport – ed uschia era la motivaziun da cumbatter cunter ils megliers. La malsogna ha dentant midà sia relaziun cun il sport da prestaziun.
Midadas en sia vita
El ha emprendì ch’il sport è «mo» ses job– e ch'i dat dasperas anc bleras autras chaussas impurtantas. Er sch’el vesa quai sco regal, da pudair viver da sia passiun, i na saja betg pli quai che defineschia el sco persuna.
La malsogna haja midà sia perspectiva sin tut. Atras quel temp grev haja el propi emprendì d’enconuscher sasez. Er haja el emprendì da tadlar meglier sin ses corp, da mantegnair ina ballantscha ed er da metter prioritads.
Uss saja el pli ferm che avant la malsogna – e perquai saja el la fin finala engraziaivel d’avair fatg tras quai.
TR Telesguard 17:40