Las traversas èn quels elements nua che las rodaglias èn fermadas vidlonder. Da fertant ch’ins dovra en Svizra per l’emprima giada quella sort traversas sinteticas, vegnan ellas gia duvradas dapi in temp en Germania. Co quai funcziunia là, sajan els stads a guardar, ha l’inschigner Lukas Sing detg al Schurnal regiunal dad SRF.
Pli persistent
Avant che montar las traversas en il Grischun haja il team d’inschigners laschà controllar il material en il labor e dumandà per lubientscha tar l’Uffizi federal da traffic. Ina traversa custa radund 200 francs per toc. Pli persistenta duai ella esser perquai ch'i dovria pli paca energia da producir ella, perquai ch'ella vegn producida ord substanzas restantas e perquai ch'i saja pli simpel da dismetter ella.
Fin fanadur ha la Viafier Retica lura montà las emprimas da quellas traversas sin in tschancun datiers da la staziun da Scuol/Tarasp.
Controllas regularas
Ussa vegnia quest tschancun controllà e surveglià regularmain, sco tschels tschancuns cun traversas convenziunalas era. Pertutgant la segirezza na fetschia Lukas Sing nagins quitads:
Nus giain mintga duas emnas sur quest tschancun per dar in'egliada.
Sche las traversas sa cumprovan, pudessan ellas remplazzar intginas da las traversas existentas. Quai pudess dentant anc cuzzar in per onns. Per l’ina vegni planisà e bajegià a lunga vista tar la viafier e per l’autra mussia pir il temp tge che quellas traversas da material sintetic tegnian propi ora tut.
Betg las sulettas traversas pli persistentas
Era autras viafiers en Svizra fan provas cun traversas pli persistentas. Quest product che la Retica dovra n'è betg il sulet ch’è sin il martgà. Sch’i giess suenter Lukas Sing, lura vuless el gugent anc testar autras purschidas ed anc montar dapli traversas da material sintetic sin ils tschancuns da la Viafier Retica.
