-
Bild 1 von 13. A San Niclà en Engiadina Bassa sa calma la situaziun plaunet. Dapi mezdi fin circa las 16:30 è il livel d'aua sa sbassà per radund 20 centimeters. Bildquelle: RTR, Reto Mayer.
-
Bild 2 von 13. A San Niclà en Engiadina Bassa n'è la via chantunala betg pli en privel. Bildquelle: RTR, Reto Mayer.
-
Bild 3 von 13. Er qua a Pradella datiers da Scuol è l'En passà sur ils urs. Bildquelle: RTR, Reto Mayer.
-
Bild 4 von 13. Da mezdi era l'En datiers da San Niclà passà sur ils urs. Bildquelle: RTR, Reto Mayer.
-
Bild 5 von 13. A13 / H13:. Pervia da la ferma plievgia èn er l'autostrada A13 sco er la via principala H13 per part serradas. Bildquelle: RTR, Federico Belotti.
-
Bild 6 von 13. Duas persunas salvadas sper Spleia – . en vischinanza dal parcadi sura da las pendicularas è vegnì stratg davent in auto cun duas persunas. Bildquelle: mad, polizia chantunala.
-
Bild 7 von 13. Aua gronda en la regiun da La Punt. Bildquelle: MAD, Daniel Gianola.
-
Bild 8 von 13. Aua gronda a La Punt. Bildquelle: MAD, Daniel Gianola.
-
Bild 9 von 13. Aua gronda era a La Punt en l'Engiadina. Bildquelle: MAD, Daniel Gianola.
-
Bild 10 von 13. La plievgia lascha crescher e crescher ils flums ed auals. Qua en la regiun da La Punt. Bildquelle: MAD, Daniel Gianola.
-
Bild 11 von 13. A La Punt èn ins preparads per il cas che l'aua gronda crescha vinavant. Bildquelle: MAD, Daniel Gianola.
-
Bild 12 von 13. Medel en Valrain –. tant l'A13 sco er la H13 èn serradas pervi da sbuvadas. Bildquelle: mad, polizia chantunala.
-
Bild 13 von 13. Serrada pervi da bovas – . la H13 sper Cabbiolo. Bildquelle: mad, polizia chantunala.
La polizia scriva en ina communicaziun a las medias ch'ella haja gì tranter las 22:00 il mardi e las 09:00 la mesemna passa 15 annunzias pervi da las plievgiadas. Ils collavuraturs da l'Uffizi da construcziun bassa, da polizia e pumpiers sajan stads en acziun en diversas parts dal chantun.
Sper divers flums che mainan aua gronda tant en la Surselva sco er en l'Engiadina èn las regiuns il pli ferm pertutgadas en il Grischun la Valrain e la Mesolcina:
Engiadina
Da mezdi era l'En ì a Son Niclà sur la riva ora. Il mument sa calma la situaziun dentant plaunet enturn l'En. Il livel d'aua è ì enavos per 20 centimeters, dapi mezdi fin il suentermezdi a las 16:30. La via principala na saja perquai il mument betg en privel.
Valrain
Sufers: Pervi da la ferma plievgia è il local dal lavuratori communal, ina plazza da gieu e duas chasas en zona d'industria vegnids inundads. Enturn mezdi eran ils pumpiers en acziun, e l'acziun è puspè sa calmada.
Spleia: Las duas persunas salvadas tar Spleia èn vegnidas stratgas davent cun lur auto dal Hübscherabach. Cun ina crana hajan ellas pudì vegnir salvadas or da lur auto, ellas hajan bain patì fraid, na sajan dentant betg feridas, scriva la polizia chantunala en ina communicaziun a las medias.
Medel: Ils abitants dad ina chasa ed ils animals da lur stalla èn vegnids evacuads preventivamain.
Mesolcina
Las plievgiadas intensivas ch’èn vegnidas annunziadas per la notg passada han tutgà fermamain las valladas dal Grischun talian. La forza dals temporals haja fatg ir surora divers auals e flums e fatg sbuvar terren, scriva RSI sin sia pagina en la rait. Uschia saja vegnida la Moesa quatter giadas pli gronda e mainia uss 400 meters cubic la secunda.
Cama: Duas famiglias èn vegnidas evacuadas.
A13: Pervi dad auaziuns tranter Lostallo e Mesocco ha stuì vegnir serrada er l’A13 tranter Tusaun-sid e Roveredo. Uschia saja la Mesolcina facticamain tagliada en duas parts. Sin l'autezza da Spleia resta la sortida serrada en omaduas direcziuns e quai fin almain dumengia ils 16.06.2019
H13: Gia durant la notg era vegnì interrut il traffic sin la via chantunala tar Soazza.
Bregaglia
Er la via da la Bregaglia saja vegnida serrada tranter Stampa e Promontogno cumplettescha RSI las interrupziuns sin las vias.
RR novitads 06:00