Siglir tar il cuntegn

Header

video
Scriver poesia è la meglra medischina
Or da RTR Social dals 14.01.2022.
laschar ir. Durada: 4 minutas 30 Secundas.
cuntegn

Poetry slam Cumbatter il burnout cun poesia

La poesia è dapli che be pleds sin palpiri per Jachen Wehrli da Cazas. Avant trais onns ha el cumenzà da scriver si ses patratgs e preschentar quels sin il palc da las concurrenzas da poetry slam. Quest hobi al ha gidà da vegnir ord sias depressiuns e ses burnout.

Avant plirs onns ha Jachen Wehrli da Cazas suffrì in burnout e depressiuns. Il motiv principal persuenter sajan stads la lavur, il regl da success ed memia autas aspectativas. Entras la crisa haja el lura gì trais dimoras en ina clinica. En quest temp saja el l’emprima giada vegnì en contact cun la poesia. El haja cumenzà da scriver si tut quai ch’ha occupà el en in text poetic. Ed lura ha el era gì il curaschi da preschentar quests texts avant public en il rom d’in poetry slam.

Co funcziuna ina concurrenza da poetry slam?

Avrir la box Serrar la box

Radund 8 persunas preschentan in suenter l’auter lur text poetic. Suenter mintga preschentaziun survegnan in pugn plain persunas dal public cartas cun notas dad 1 fin 10. Silsuenter vegnan lura ils puncts dumbrads ensemen.

Las duas poetas u poets cun ils pli blers puncts han lura da preschentar en il final in segund text. Suenter il final decida il public tgi ch'è il victur u la victura, cun applaudir. La persuna cun il pli grond applaus daventa il campiun respectiv la campiunessa. Tradiziunalmain survegn il victur u la victura ina buttiglia vinars sco premi, e quella parta el gist cun tut las poetas e poets sin tribuna.

audio
Il slammader rumantsch Jachen Wehrli raquinta
ord RTR Audio dals 15.01.2022.
laschar ir. Durada: 4 minutas 3 Secundas.

Davent da quest mument saja el stà fieu e flomma per questa furma da litteratura. Bainprest haja el lura era gudagnà ils emprims premis. Cun la poesia ha el era emprais d'enconuscher nova glieud ch’ha avert ad el la vita professiunala. I dettia bleras firmas che cudescheschian el per festas privatas u per scriver texts da reclama.

Jachen Wehrli preschenta ses text.
Legenda: Sin il palc sa senta el dachasa. Gugent raquinta el davart ses burnout ed emprova uschia da rumper il tema da tabu. MAD, Jachen Wehrli

Ils slammers èn ina famiglia

Fin ussa saja la scena cunzunt activa en las citads grondas en la Bassa – sco Berna, Basilea e Turitg. La gronda part dals slam poets sajan students tranter 19 e 25 onns. Quai n'haja l’um da 44 onns dentant mai vis sco problem. Mintgin saja bainvegnì, e cura ch’ins saja sin tribuna na stoppian ins betg avair tema da vegnir tschivlà ora.

Jachen Wehrli sin il palc.
Legenda: Il victur da la saira Jachen Wehrli en ses element. Entamaun il vinars ch'ins gudogna tradiziunalmain tar in poetry slam. MAD, Jachen Wehrli

Poesia n’è betg striegn

Tar la poesia saja quasi tut lubì, declera il slam poet Jachen Wehrli. I na saja insumma betg necessari ch’il text consista da rimas e versets. L’impurtant saja ch’il text saja autentic e vegnia dal cor. Perquai scriva el tranter auter davart ses burnout, ed ha schizunt creà in entir program da tribuna ch’el preschenta sin ils palcs en tut la Svizra.

RTR

Artitgels legids il pli savens

Scrollar a sanestra Scrollar a dretga