Avant plirs onns ha Jachen Wehrli da Cazas suffrì in burnout e depressiuns. Il motiv principal persuenter sajan stads la lavur, il regl da success ed memia autas aspectativas. Entras la crisa haja el lura gì trais dimoras en ina clinica. En quest temp saja el l’emprima giada vegnì en contact cun la poesia. El haja cumenzà da scriver si tut quai ch’ha occupà el en in text poetic. Ed lura ha el era gì il curaschi da preschentar quests texts avant public en il rom d’in poetry slam.
Davent da quest mument saja el stà fieu e flomma per questa furma da litteratura. Bainprest haja el lura era gudagnà ils emprims premis. Cun la poesia ha el era emprais d'enconuscher nova glieud ch’ha avert ad el la vita professiunala. I dettia bleras firmas che cudescheschian el per festas privatas u per scriver texts da reclama.
Ils slammers èn ina famiglia
Fin ussa saja la scena cunzunt activa en las citads grondas en la Bassa – sco Berna, Basilea e Turitg. La gronda part dals slam poets sajan students tranter 19 e 25 onns. Quai n'haja l’um da 44 onns dentant mai vis sco problem. Mintgin saja bainvegnì, e cura ch’ins saja sin tribuna na stoppian ins betg avair tema da vegnir tschivlà ora.
Poesia n’è betg striegn
Tar la poesia saja quasi tut lubì, declera il slam poet Jachen Wehrli. I na saja insumma betg necessari ch’il text consista da rimas e versets. L’impurtant saja ch’il text saja autentic e vegnia dal cor. Perquai scriva el tranter auter davart ses burnout, ed ha schizunt creà in entir program da tribuna ch’el preschenta sin ils palcs en tut la Svizra.