Per la quarta giada ha lieu il festival «Polenta 7000» a Cuira. Dals 3 da matg enfin ils 3 d'avust po in e scadin visitar mintga gievgia, venderdi e sonda l'areal dal «Walserbühl» ch'è era enconuschent sco «Polentahügel». Differents acts da musica, dis da saut, circus per uffants u era lotto stattan sin il program.
Impressiuns dal areal
-
Bild 1 von 7. Tut è pront per il festival. Bildquelle: RTR.
-
Bild 2 von 7. Durant trais mais vegn stà qua da cuminanza mintga gievgia, venderdi e sonda. Bildquelle: RTR.
-
Bild 3 von 7. Davos la bar «büvetta» stattan tranter auter era blers voluntaris. Bildquelle: RTR.
-
Bild 4 von 7. Il festival è vegnì pli professiunals ils davos onns. Bildquelle: RTR.
-
Bild 5 von 7. Sin questa tribuna sa preschentan durant la stad plirs acts musicals. Bildquelle: RTR.
-
Bild 6 von 7. La terrassa è ina da las novas chaussas da la quarta ediziun dal festival. Bildquelle: RTR.
-
Bild 7 von 7. Polenta 7000? Il num vegn sa chapescha dal uschenumnà «Polentahügel» che sa chatta gist per l'areal. Bildquelle: RTR.
Il «Polenta 7000» ha entschet pitschen. Avant quatter onns era tut in pau pli provisoric e pitschen. Il festival è creschì, ma el duai anc adina restar simpel e nuncumplitgà, uschia la co-manadra Anne Sommer.
Nus essan daventads pli professiunals, gea, ma nus avain anc adina il spiert da simplamain far ed empruvar. Era sche betg tut gartegia adina.
Quest onn è l'emprima giada ch'il festival cumenza cun cifras nairas. Il festival vegn sustegnì dal chantun, da la citad e da differents auters sponsurs. Perquai po l'uniun era pajar quest onn ina gascha minimala als musicists ed a las musicistas, era sch'els ston annullar in di da festival pervia da la schletta aura. Tut las entradas supplementaras da la saira van als acts musicals. Da la partida èn quest onn tranter auter: Tiavo, Disco Morgana, Nesta and the Blondes, Angela Aux, Odd Beholder, Peter the human boy, Phoam, Juicy Lemon Club, Sound8Orchestra, Giganto, Ernesto, Junipa Gold e Siselabonga. Per il festival sco tal na ston ils visitaders e las visitadras betg pajar entradas.
Noss motto è vinavant – ins dastga tut, ma na sto nagut.
Perquai che l'uniun è creschida ils davos onns, han els avunda voluntaris e voluntarias che sa gidan e s'engaschan per part durant sis mais per il festival. La filosofia è era là: mintgin e mintgina sa gida là nua ch'ella vul e po gidar ed els sajan averts per novas ideas ed atgnas iniziativas.
Il festival duai er anc cuntinuar ils proxims onns. Perquai fiss il giavisch dals organisaturs ch'els pudessan era vinavant nizzegiar l'areal – gugent er ordaifer il temp da festival per pudair simplifitgar las preparativas. L'areal «Walserbühl» ch'è enconuschent sco «Polentahügel» era vegnì regalà a la populaziun da Cuira sco spazi liber da recreaziun. Per mantegnair quest intent vulan ils organisaturs er en il futur contribuir lur part.