L’iniziativa chantunala dal pievel «Transparenza en la finanziaziun da la politica» n’è betg reussida. ll termin dad in onn per rimnar 3'000 suttascripziuns valaivlas saja scadì, ha communitgà la Chanzlia chantunala. Tenor copresident Maurus Müller saja la raschun fitg simpla: La Juso GR haja ramassà memia paucas suttascripziuns.
Il mument èn ils commembers e las commembras da la Juso GR occupads cun las elecziuns naziunalas dal proxim onn e cun in’iniziativa naziunala da la Juso Svizra. Lantschà l’iniziativa avevan ils Giuvens socialists l’onn passà. Quai cun l’intenziun da purtar enavos la fidanza en la politica. Per quest intent ha la Juso pretendì che partidas stoppian inditgar en l’avegnir publicamain lur finanzas. Quai a partir da 10'000 francs tar campagnas d’elecziun ed a partir da 3'000 francs tar donaziuns.
