Armin Panzer da Trin ha visità dacurt ensemen cun nov autras persunas da differentas vegliadetgnas, professiuns, tenutas politicas e da differents chantuns da la Svizra, il bain puril da Sep Benedetg Candinas a Sumvitg. Quai ha el fatg sco commember dal cussegl da burgaisas e burgais dal project «Ernährungszukunft Schweiz» che duai entaifer da radund in mez onn chattar in catalog da mesiras per la politica federala, co ins pudess sa nutrir a moda e maniera pli persistenta, sanadaivla e cun products producids fair. En tut cumpiglia il cussegl 95 persunas che s'inscuntran a sesidas ubain fan excursiuns per visitar la pratica. Uschia er a Sumvitg tar Sep Benedetg Candinas che ha preschentà a la gruppa il «Bergsolawi».
Vender er la carrotta crutscha
«Solawi» stat per «solidarische Landwirtschaft» ed è ina furma da collavuraziun tranter il consument ed il producent. Il consument sustegn finanzialmain il puresser, vegn er sez magari a gidar da far tschertas lavurs, e survegn persuenter sur l'entir onn ina part da la racolta, respectiv da tut ils products ch'èn vegnids producids. E quai senza ch'il pretsch variescha. Quai dettia er al pur segirezza da producir senza squitsch. Sep Benedetg Candinas fa in exempel:
Uschia poss jau er vender la carrotta crutscha.
E tut la puma. Pertge sch'el faschess cun quella most tar las mostarias regiunalas fiss quai memia char per vender, cun il «solawi» funcziuna quai.
Ils impuls che Armin Panzer ha rimnà a Sumvitg porta el pli tard en la discussiun cun la gruppa gronda. Per el persunalmain è quai cunzunt «che er il consument ha da porscher dapli, perquai ch'il producent ha gia avunda restricziuns». La finamira dal cussegl da burgaisas e burgais è, da formular in catalog da mesiras concretas per la politica federala.