Datiers dal pausadi Heidiland sin l'autostrada A13 hai dà la dumengia saira in accident. Ina giuvna da 19 onns charrava cun ina passagiera en direcziun Sargans, cura ch'in BMW alv è vegnì dal pausadi sin l'autostrada. L'auto saja entrà uschè stretg, che la giuvna haja stuì guntgir e saja collidada cun la saiv amez, scriva la Polizia chantunala. Las duas dunnas sajan restadas senza blessuras. L'auto è però vegnì donnegià cumplettamain.
Uss tschertga la polizia perditgas sco er las persunas en il BMW alv cun numer turitgais.