L'atun 2019 han las vischnancas dà l'incumbensa per in plan da management, quel pon ins cumparegliar cun in plan da construcziun detaglià. Quel vegn preschentà la fin settember a las vischnancas. Silsuenter decida la populaziun sch'il parc internaziunal Rätikon po vegnir realisà en il Partenz u betg.
Suenter las decisiuns a nivel communal, dovri il consentiment chantunal e federal. Sche tut va tenor plan vegnia il parc da natira realisà l'emprim per trais onns. Sch'i duai dar in manaschi a lunga vista, lura ston las vischnancas anc ina giada decider.
Custs annuals da 1 fin 1,5 milliuns francs
Tenor la communicaziun da la regiun Partenz/Tavau muntan ils custs per ils emprims trais onns a 1 milliun francs, e silsuenter ad 1,5 milliuns francs. Dus terzs da quels custs duain il chantun e la Confederaziun surpigliar. Las vischnancas na stoppian betg quintar cun dapli expensas, cunquai ch'il parc da natira surpiglia lavurs che giajan uss sur il turissem Partenz u sur la regiun.
1'100 kilometers quadrats
10 vischnancas en il Partenz, tuttas 11 vischnancas en il Principadi da Liechtenstein e 9 vischnancas en il Vorarlberg sa participeschan al project. Sche tuttas èn la finala da la partida avess il parc natiral internaziunal ina surfatscha da 1'100 kilometers quadrats e fiss il pli grond parc natiral en las Alps.
