Il center regiunal d'administraziun dal chantun Grischun a Poschiavo è il segund center regiunal d'administraziun sin territori da lingua taliana dal chantun ed il otgavel insumma. Gia en funcziun èn ils centers a Cuira, Landquart, Tavau, Tusaun, Glion, Scuol e Roveredo. A Poschiavo vegnan sis uffizis chantunals cun 17 plazzas da lavur centralisads.
L'uffizi regiunal dal servetsch social Bernina, la cussegliaziun da scola e d'educaziun, l'inspecturat da scola, il Center regiunal per intermediaziun da lavur CIL, la cussegliaziun da professiun, da studi e da carriera e la Polizia chantunala sa chattan uss pia tuts sut in tetg. Grazia la concentraziun saja pussaivel da trair a niz sinergias ed er per la populaziun saja uschia pli cler nua ch'ils uffizis sa chattan ed i possia vegnir garantì in servetsch effizient, ha ditg il cusseglier guvernativ Mario Cavigelli.
Plazzas da lavur garantidas
Sco Arturo Plozza, il president da la regiun Bernina ha ditg, saja quest center impurtant per il Puschlav. Tras il center demussia il Chantun numnadamain che las plazzas da lavur restan er en il futur en la val e sajan uschia garantidas.