Actualmain quinta la scola professiunala a Poschiavo 95 emprendistas ed emprendists che vegnan scolads en las differentas professiuns. In record. Tuttina n’è quella cifra betg ina garanzia che l’unica scola da lingua taliana en noss chantun na vegn betg redimensiunada.
Proposta en consultaziun
L’Uffizi chantunal da furmaziun propona da fixar in minimum d’emprendists ed emprendistas per las scolas professiunalas. Ils responsabels da la scola a Poschiavo ed er ils mastergnants en val teman ch’il svilup demografic vegniss tras uschè in pass anc rinforzà, uschia il co-directur da la Scola professiunala Poschiavo, Lino Compagnoni envers RSI.
Il cusseglier guvernativ Jon Domenic Parolini ha chapientscha per ils quitads en la Val Poschiavo. El vesa dentant er che la proposta dal chantun haja almain procurà per ina discussiun animada e per in moviment tranter ils mastergnants. Quels veglian uss intensivar la tschertga da novas emprendistas ed emprendists en val.
Decis n’è anc nagut
Ils 9 da mars vegni a dar in inscunter tranter ils represchentants da las 12 scolas professiunalas en Grischun, ils responsabels da l’Uffizi da furmaziun ed il schef dal departament, Jon Domenic Parolini.