Suenter ch'il cartel da construcziun en l'Engiadina Bassa è vegnì public tras il whistleblower Adam Quadroni, ha il chantun Grischun endrizzà in post d'annunzia independent ed extern. Quest post d'annunzia ha tratg sia emprima bilantscha. Mo in avis saja arrivà tar il post d'annunzia e questa indicaziun n'haja manà a nagut.
Cler na pon ins betg dir ch'i na dess pli naginas cunvegnas da pretsch en il Grischun sche questa plazza na vegn betg duvrada bler.
Ils experts e las expertas èn dentant da l'avis, che mo gia l'existenza d'in tal post d'annunzia possia effectuar insatge, sco quai ch'il manader da fatschenta da Transparency International Svizra di en in'intervista envers il schurnal regiunal Grischun da SRF.
Il post d'annunzia ha segiramain in effect starmentus.
In factur impurtant che saja ussa garantì è, che las persunas possian furnir las annunzias a moda anonima. Uschia saja la retegnientscha pli pitschna per far l'annunzia. En il cas Adam Quadroni na saja quai gnanc stà il giavisch, ma Urs Thalmann vesa quai sco fitg impurtant.
In auter punct impurtant è ch'i dess ina transfurmaziun en la societad. Uschia che whistleblowers vegnan appreziads e betg exiliads.