Las fracziuns da la Partida populara (PPS), la Partida liberaldemocratica (PLD) ed ils Verd-liberals (PVL) n'èn betg cuntentas cun il sistem da pensiun actual per anteriurs cussegliers e cusseglieras guvernativas.
Las trais partidas han perquai inoltrà incumbensas a la regenza, per che lezza preschentia in midament dal reglament da las pensiuns al Cussegl grond. Uss sto la regenza s'occpar da las incumbensas e proponer tge far cun quellas. Ina debatta datti lura en ina da las proximas sessiuns dal Cussegl grond.
Las trais partidas han dentant differentas ideas co midar il reglament da pensiun.
Abolir il sistem actual
La partida populara vul stritgar il sistem actual da pensiuns. La PPS suttastritga ch'i na saja betg difficil da chattar novas plazzas per anteriurs cussegliers e cusseglieras guvernativas. Ella intunescha, che be pli 6 auters chantuns hajan anc ina tala pensiun, ella na saja betg pli confurma al temp. Ella vul incumbensar la regenza da chattar ina soluziun che saja pli confurma al temp.
Betg pli pensiun per vita duranta
Ils Verdliberals proponan en lur intervenziun da limitar la pensiun sin 3 onns suenter il temp en uffizi. La pensiun per vita duranta saja in privilegi betg giustifitgabel, uschia la partida. L'experientscha mussia ch'anteriurs commembers da la regenza n'hajan betg problems da chattar novas plazzas da lavur.
La fracziun da la Partida liberaldemocratica declera, ch'il sistem fetschia bain senn per il Grischun. Il temp d'uffizi saja numnadamain limità, cuntrari a blers auters chantuns en Svizra. Tenor la PLD duai la pensiun però be pli vegnir pajada fin la vegliadetgna da pensiun.