La suprastanza da la SRG SSR Svizra Rumantscha surdat il premi SRG.R 2025 a la chantadura e cumponista Bibi Vaplan ed al dirigent, cumponist e pedagog da chant Rico Peterelli.
Musica poetica ed innovativa rumantscha per in grond public
L'Engiadinaisa Bibi Vaplan (Bianca Mayer) chanta exclusivamain en idiom vallader. Ella vala sco ina da las vuschs musicalas las pli impressiunantas da la nova generaziun, scriva la SRG.R en sia communicaziun. Cun sia musica poetica ed innovativa — sco per exempel cun sia Popcorn-Opera — dat ella a la lingua rumantscha ina nova forza artistica e moderna.
Sias cumposiziuns reflecteschan temas profunds ed universals, ed ellas fan udibel il rumantsch ad in public vast.
Influenza musicala per generaziuns
Rico Peterelli da Savognin è dapi decennis ina figura centrala en la scena da musica dal Grischun. Sco dirigent, cumponist ed anteriur scolast da chant ha el influenzà generaziuns da chantaduras e chantadurs.
El sa deditgescha cun grond engaschi a projects sco il chor dals seniors grischuns Canziano e numerus auters projects da musica, promovend cun quai tranter auter la lingua e la cultura rumantscha tant en la generaziun veglia sco er tranter ils giuvens.
La ceremonia da surdada ha lieu durant la radunanza generala da la SRG.R, ils 24 da matg 2025 a Sent ed è averta al public.