La premiaziun annuala vegnia organisada or da differents motivs, scriva la scola da purs. Ella saja ina pussaivladad unica per vesair quasi tut ils chaschiels d'alp dal chantun en in lieu. En pli porscha ella er ina pussaivladad per obtegnair ina survista da la qualitad da la producziun. Svilups negativs possian vegnir identifitgads immediatamain e cuntramesiras sco scolaziuns pon vegnir lantschadas. Il meglier chaschiel vegn premià d'ina giuria tenor ils sequents criteris:
- exteriur e qualitad da conservar
- la pasta
- la foras
- il gust ed l'aroma
- sbagls sco pitradad vegnan notads e puncts vegnan tratgs giu
Fastizs da la stad extraordinaria
Expertas ed experts ord la scena d'alp, da la gastronomia e da la cussegliaziun han resguardà quels criteris e premià 11 chaschiels cun bronz, 12 cun argient e 13 cun aur.
Tar intginas magnuccas han las expertas ed ils experts dentant era percurschì fastizs da la stad chauda e las temperaturas autas. Per exempel han intgins suà memia fitg e n'han uschia betg ina bella crusta. La qualitad dals chaschiels saja buna enfin fitg buna ed insumma betg mendra che auters onns, din ils experts e las expertas.
Pli paucs products d'alp
Sco il Plantahof scriva, hajan las alps grischunas chaschà quest onn 5% damain en congual cun la media dad auters onns, il motiv è la setgira. Las cifras exactas vegnan ins dentant pir a savair l'enviern proxim.
Or da l'archiv
