A Tavau enconuschan ins ella, la Valérie Favre Accola. Ed uschia èn ina massa persunas vegnidas per far in viva sin la nova presidenta dal Cussegl grond. Suenter in apéro per la populaziun sin la plazza d’Arcadas a Tavau, è la cumpagnia envidada sa stuschada en la gronda sala da l'Hotel Schweizerhof Morosani.
-
Bild 1 von 2. Persunas da la politica naziunala, sco Martin Candinas, blers politichers e politicras chantunalas e persunas indigenas èn vegnidas per far in viva. Bildquelle: RTR.
-
Bild 2 von 2. Durant l'apero hai dà musica instrumentala da la scola populara da Tavau. Bildquelle: RTR.
Ils deputads e las deputadas dal Cussegl grond, la regenza, l’administraziun chantunala ed ulteriurs giasts han adina puspè mess davent la pusada per tadlar e splattar per ils pleds divertents da las differentas partidas.
-
Bild 1 von 3. En ina sala han tut las persunas envidadas prendì plazza. Circa 240 persunas han mangià e tadlà ils divers pleds da las partidas. Bildquelle: RTR.
-
Bild 2 von 3. La decoraziun da maisa en las colurs da Tavau. Bildquelle: RTR.
-
Bild 3 von 3. Il cor dal Cussegl grond ha chantà durant ils curs dal menu per la cumpagnia. Bildquelle: RTR.
PPS e PLD a la testa dal Grischun
Valérie Favre Accola da la PPS vegn l'onn proxim a manar las sedutas dal Cussegl grond sco pli auta Grischuna. Sper ella prenda plazza Fabio Luzio da la PLD, sco vicepresident.
Igl èn passads 21 onns, dapi che la partida populara Svizra è stada a la testa dal parlament grischun. Il 2004 era Christian Möhr, da la PPS, vegnì elegì sco president dal Cussegl grond. Dapi lura eran adina persunas d’autras partidas las persunas las pli autas. Il 2008 è la partida lura sa fundada e sa bajegiada si da nov. Perquai saja quai uss in mument spezial per la partida, ils cumpogns e las cumpognas da viadi sco era per Valérie Favre Accola sezza.