La vischnanca da Razén aveva cun tut las forzas empruvà da motivar las persunas da candidar per il presidi. Tut ils discurs e volants èn dentant stads senza success. Er in inserat sin plattafurmas da plazzas da lavur n'ha betg gidà. Candidats potenzials han adina puspè menziunà, è ch'il pensum da lavur da 60% saja memia bass. Perquai ha la vischnanca stuì reagir ed ir sur ils cudeschs.
Durant la radunanza communala è lura vegnì acceptà l'augment dal pensum sin 80% – ina decisiun che procura per custs supplementars da passa 37'000 francs. Quai munta ina sfida per la vischnanca ch'è gia en las stretgas finanzialmain.
En sasez n'avain nus betg quels raps.
L'augment dal pensum haja dentant gia gì in effect. Anc durant la radunanza communala hajan pliras persunas exprimì interess via da l'uffizi da presidi. Uschia ha la vischnanca da Razén uss almain nova speranza da chattar ina persuna che succeda a Reto Loepfe, che banduna il timun sin la fin da quest onn.
Er autras vischnancas han fadia da chattar presidents
Sper Razén è era la vischnanca da Claustra a la tschertga d'in president u ina nova presidenta. Els han spustà l'elecziun sin in termin pli tard cun la speranza ch'i dettia anc annunzias da persunas interessadas.
Tenor l'Uffizi da vischnancas grischun na saja quai dentant betg alarmant che gist duas vischnancas han il medem mument problems d'occupar lur presidi. Simon Theus, il substitut dal directur da l'Uffizi da vischnancas grischun, declera ch'i saja normal che tschertinas vischnancas dovran pli ditg da chattar in nov chau al timun.
Qua dettia dentant pliras opziuns sco reagir sin quest problem – augmentar il pensum u la paja per l'uffizi sajan be dus exempels. Mintga vischnanca reglia quai sezza tenor meglier savair e pudair e tut tenor ils agens basegns.