L’onn entschaiva sco usità cun la cuppa mundiala da snowboard a Scuol e cun il Laax Open. Il schaner vegnan era preparadas las loipas sur las vias en l'Engiadin’Ota per La Diagonela. En mintga cas è l’aura adina puspè tema – era tar il White Turf a San Murezzan. Ils ultims onns han numnadamain stuì vegnir stritgadas pliras cursas perquai che parts dal lai da San Murezzan eran zugliadas cun aua. Quai n'è betg mo malempernaivel per ils giasts ch'han bletsch ils pes, mabain era betg segir per ils chavals ed ils atlets ed atletas.
Il favrer avra Lai las portas per il campiunadi mundial da biatlon. In tal campiunadi n'hai anc betg dà en Svizra. Quest eveniment custa passa 12 milliuns francs. Ils organisaturs ed organisaturas han preparà ina tribuna cun 7’500 plazzas per la glieud che vegn a guardar. Durant dus emnas datti 12 cumpetiziuns.
Il mars ha alura lieu il maraton da 42 kilometers engiadinais da Malögia a S-chanf. L’onn passà hai dà schuschuris cun la rangaziun – i n'era betg cler tgi ch'ha gudagnà. Trais sportists e sportistas èn vegnidas disqualifitgadas pervia da fastizs da fluor vi dals skis. Ils tests na sajan dentant betg vegnids fatgs tenor protocol ed uschia valevan las victorias tuttina. L’Engiadinaisa Giuliana Werro è en sasez vegnida sco segunda sur la strivla da l’arrivada. La victura è dentant vegnida disqualifitgada ed uschia ha Giuliana Werro survegnì la medaglia d’aur. Pli tard ha la FIS alura tratg enavos las disqualificaziuns e la rangaziun oriunda valeva puspè. Quest onn duess il 55avel maraton engiadinais funcziunar senza fluor e senza schuschuris.
Il mars ha era lieu il campiunadi mundial da Freestyle sin il Corvatsch e Corviglia. 1’500 atletas ed atlets cumbattan en 15 differentas disciplinas. En tut custa l’event 18,5 milliuns francs. Per ils campiunadis mundials è vegnida bajegiada ina mesapipa. Sper il sport datti era da mangiar e concerts. Per exempel procuran Sido, Stress u Alle Farben per divertiment musical sin 2’700 meter sin il Corvatsch.
Sport da stad
Il matg savessi vegnir tar in final tranter rumantschs en la Cuppa Grischuna da ballape. En il mezfinal gioga il CB Trun/Rabius encunter il CB Lumnezia ed l’US Schluein encunter Landquart. Pia po be anc Landquart disturbar ina festa Sursilvana en la Cuppa Grischuna.
La stad ha lieu la festa da lutga chantunala dal Grischun ed Glaruna a Domat. En pli vegnan ils ciclists da la Tour de Suisse per la 10avla giada sur il pass da l’Alvra a La Punt.