Quest onn na datti nagina navada sur ils dis da festa. Sulet en il nord da la Surselva poi dar in zichel naiv davent da 1'500 meters sur mar, pli bass poi dar plievgia, di Jürg Ackermann da SRF Meteo sin dumonda da RTR.
Adia sulegl
Suenter ils dis fraids da bellezza turnan ils nivels e las temperaturas s’augmentan. Il di ora sa mussa quai p. ex. suandantamain:
- Val dal Rain da Cuira: 7°
- Mustér: 6°
- Engiadin'auta: 2°
Cun in zic cletg sa mussa il sulegl lura l’avantmezdi dal di da Nadalnotg e da Nadal. Era il suentermezdi da Son Steffan po il sulegl cuchegiar atras ils nivels, di Ackermann.
Da Nadalnotg na pon ins betg vesair la staila da Betlehem pervia dals nivels.
Allegra vent
Tenor las prognosas na vegnia betg a cuflar, ma il vent po buffar cun enfin 70 kilometers l’ura. Quai muntia che las pendicularas possian ir senza problems, ma betg emblidar ina grossa giacca d’enviern, manegia Ackermann.
Tut tenor datti naiv l’emna proxima
Tgi che spetga sin naiv po sperar sin mardi. Il cunfin da naiv è sin 1'400 meters sur mar. Mesemna e gievgia vegni dentant puspè pli chaud ed il cunfin s'auza per part sin 2'000 meters sur mar, uschia il meteorolog Jürg Ackermann.
