Tranter 50 e 80 millimeters plievgia duai dar qua fin venderdi, di Simon Eschle, meteorolog da SRF Meteo. Principalmain las regiuns dal sid èn pertutgadas: il Mesauc, la Bregaglia, il Puschlav e l’Engiadin’Ota.
Blera plievgia munta savens era ch'i dat donns da malauras sco sbuvaditschs, inundaziuns u auas grondas. Las valladas dal sid han patì gia l'entschatta da la stad da quels e las consequenzas senta la populaziun anc adina. Tenor Simon Eschle èsi pussaivel che la gronda quantitad da plievgia savess era quella giada chaschunar donns.
La plievgia e la malaura portan er temperaturas pli fraidas. En las regiuns autas poi gia dar intgins flocs da naiv ils proxims dis. Oz è il cunfin da naiv stà sin 3'000 meters, el sa sbassa dentant cuntinuadamain.
I vegn pia fraid e bletsch. Ma il meteorolog ha er ina buna novitad:
La dumengia vegn il di il pli sulegliv cun paucs nivels ed en il blers lieus resti er sitg.
