Il discletg saja capità dumengia suentermezdi enturn las trais, sco la Polizia chantunala ha communitgà. Pertutgadas sajan duas dunnas enturn 60 onns ch’èn vegnidas surprendidas d’ina lavina spontana. Quai eveniment è schabegià ad Isola en la regiun da Malögia. Ina da las dunnas saja stada cuverta cumplettamain da la naiv e l’autra mez. In um che saja stà vi da preparar la pista haja, ensemen cun autras persunas, pudì gidar a las duas dunnas. Tenor Kurt Winkler da l'Institut federal per la perscrutaziun da naiv e lavinas (SLF) schabegia uschia in cas per cletg fitg darar.
Ina loipa da passlung è sco ina via da traffic u ina pista da skis. Qua guardan las autoritads localas che quellas sajan segiras.
Tuttina aud’ins adina puspè da lavinas che sutterreschan loipas u sendas d’enviern. In sumegliant cas è capità avant trais onns a Goms en il chantun Vallais. Là ha ina lavina era tschaffà dus passlunghists che han pervia da quai stuì ir en l'ospital. Sin la dumonda schi fetschia senn dad era dar in sguard en il bulletin da lavinas sch’ins fetschia passlung, manegia Kurt Winkler dal SLF: na, definitiv betg.
Las autoritads localas èn responsablas per giuditgar la segirezza da las loipas. Per in laic è quai quasi nunpussaivel. E quai fan las autoritads fitg precis.
Tenor Kurt Winkler dal SLF, dettia els culms mai ina segirezza totala. In tschert ristg, quel restia adina.
Privel da lavinas
Or da l'archiv: