Siglir tar il cuntegn

Header

audio
Acziun «Grittibänz» durant di da persunas cun impediments
Or da Actualitad dals 03.12.2022. Maletg: RTR
laschar ir. Durada: 2 minutas 47 Secundas.
cuntegn

Pro Infirmis Pops da pasta per il di mundial da las persunas cun impediments

Al di mundial da las persunas cun impediments vul la Pro Infirmis dar in segn cun ils pops da pasta e far attent a las barrieras existentas per umans cun impediments. Cun la finamira da crear ina societad pli inclusiva.

Per il di mundial da persunas cun impediment fa la Pro Infirmis gia dapi il 2019 l'acziun «Da la medema pasta». Cun quella acziun vegnan fatgs e vendids pops da pasta. I n'èn dentant betg pops da pasta usitads, mabain tals cun in impediment vesaivel sco mo 1 chomma u cun ina sutga cun rodas.

Am Stand am Markt in Chur in 2021 werden Grittibänze verkauft
Legenda: Acziun «Da la medema pasta» da 2021 Pro Infirmis

Cun l'acziun duai ins mussar che tut ils umans èn fatgs cun la medema pasta, pia tut ils umans èn eguals. In'egualitad na dettia dentant anc ditg betg. Per persunas cun impediments dettia en il mintgadi bleras barrieras. Saja quai en il spazi public, sin il martgà da lavur u en la politica. E la Pro Infirmis veglia reducir quellas barrieras, di Katrin Thuli-Gartmann, la manadra da Pro Infirmis Grischun.

I va persuenter che las barrieras vegnan reducidas, er en ils cors ed en ils chaus e ch'i vegn fatg attent che l'access n'è anc betg dal tuttafatg egual
Autur: Katrin Thuli-Gartmann Pro Infirmis

L'acziun è vegnida lantschada l'onn 2019 en il chantun Glaruna. Ussa vegn ella realisada en quasi tut ils chantuns. In Svizra han 20% dals umans in impediment. Quai pon esser impediments corporals, psichics u cognitivs. Ins stoppia esser conscient ch'ins na possia betg adina vesair impediments, di Katrin Thuli-Gartmann.

Ils pertutgads fan part da l'acziun e vendan ils pops da pasta. Per la manadra da Pro Infirmis saja quai stà fitg bel tar l'ultima acziun sco che las persunas pertutgadas èn sa mussadas e cun tge plaschair ch'ellas han vendì lur pops da pasta.

Am Stand von Pro Infirmis werden Grittibänze verkauft
Legenda: Stan da Pro Infirmis venda pops da pasta Pro Infirmis

A moda e maniera simpatica vul la Pro Infirmis effectuar insatge positiv e far in pass en direcziun societad pli inclusiva. Per cuntanscher questa finamira dovri dentant dapli. I saja in lung process da passa blers onns. E per daventar propi ina societad inclusiva stoppia mintgin e mintgina far insatge persuenter e betg mo organisaziuns sco Pro Infirmis.

Messadi che sesanfla sin mintga satget

Avrir la box Serrar la box

Ti ans pertschaivas. Ma ans prendas ti era serius?

Ti ta laschas inspirar da nus. Ma ans laschas ti era cundecider?

Nus essan umans cun impediment. Ma essan nus per tai era umans?

Igl è temp da surmuntar las barrieras en tes chau ed en tes cor

Perquai che nus essan qua, nus essan blers e nus tutgain latiers.

Ta disa londervi.

Artitgels legids il pli savens

Scrollar a sanestra Scrollar a dretga