La Pro Natura na fa nagin recurs cunter l'ordinaziun da la regenza da schluppettar dus lufs dal triep dal Calanda. L’organisaziun per la protecziun da la natira ha dentant punctuà da s'engaschar vinavant per ina politica prudenta pertutgant ils lufs. La via politica en connex cun il luf na duai betg sa concentrar sin schluppettadas da lufs, mabain sin l'aspect positiv ch'il return dal luf portia cun sai.
WWF fa recurs sco mesira da prevenziun
Il WWF Svizra vul prender mesiras da prevenziun per evitar en il futur schluppettadas da lufs. El ha inoltrà in recurs tar las Dretgiras administrativas dals chantuns Grischun e Son Gagl.
Basa legala na tanscha betg
Omaduas organisaziuns èn conscientas che la basa legala na tanscha il mument betg per evitar immediat schluppettadas. Las cundiziuns che sajan da nov formuladas en la lescha da chatscha sajan formuladas avert. Uschia possian las autoritads agir senza limita, punctuescha la Pro Natura.
Lubientscha limitada
Il december passà aveva l'Uffizi federal d'ambient lubì da sajettar dus lufs dal triep dal Calanda. Uschia duain ils ulteriurs lufs dal triep puspè vegnir pli timids ed evitar zonas abitadas. Ils chantuns Son Gagl e Grischun avevan dumandà da sajettar ils dus lufs. La lubientscha per sajettar ils dus lufs è limitada. Ella vala mo enfin la fin da mars 2016.
RR novitads 10:00