La Procura publica grischuna aveva instradà ina inquisiziun penala encunter il manader da l'Uffizi per migraziun e dretg civil dal Grischun il december 2024. Il motiv era il suspect d'avair malduvrà l'uffizi. L'impuls era vegnì dad ina denunzia penala pervi dad ina lubientscha da dimora refusada.
Ils delicts rinfatschads envers l'accusà na sajan dentant betg accumplids. A questa conclusiun vegn uss la giustia e distgargia uschia il manader d'uffizi. La sistida na saja dentant anc betg cun vigur legala, cunquai che la recurrenta ha fatg recurs tar la dretgira superiura, ha la procura publica ditg envers Keystone-SDA
Per tge vai?
Punct da partenza per l’inquisiziun era ina lubientscha da dimora dal tip B. L'uffizi grischun aveva pretendì garanzias finanzialas dad autras persunas per la dunna dischoccupada tudestga ch'aveva dumandà la lubientscha. In um vulevia dar ina tala garanzia, però ina limitada. Ina tala garanzia fixa e nunlimitada che l'uffizi pretendeva n'ha nagin vulì surpigliar, uschia che l'uffizi ha refusà la lubientscha da dimora.
Tribunal federal incarichescha l'uffizi da dar la lubientscha
Il Tribunal federal ha silsuenter dà raschun a la dunna ch'era sa dustada encunter la decisiun da l'uffizi grischun (sentenzia 2C_891/2022). Uschia ch'il Tribunal federal ha cassà la decisiun da la Dretgira d'administraziun dal Grischun ed incumbensà l'Uffizi per migraziun grischun il matg passà, da dar la lubientscha da dimora a la dunna. La garanzia finanziala da l'um na saja formalmain bain betg nunlimitada, n'haja però era betg definì ina fin. Uschia tanschia quella per dar la lubientscha.
Tenor il departament chantunal haja l'um inoltrà en il num da la dunna ina denunzia penala encunter il manader da l'uffizi da migraziun grischun. Davart la procedura pendenta na piglia il departament però betg posiziun.