Siglir tar il cuntegn

Header

audio
Dretgira cirquitala da Turitg sa prepara per process
Or da Actualitad dals 04.11.2021.
abspielen. Laufzeit 3 minutas 44 Sekunden.
cuntegn

Process Pierin Vincenz Dretgira a Turitg sa prepara – cun in culm dad actas

In dals pli gronds process economics da la Svizra cumenza il schaner a la dretgira cirquitala a Turitg. Culms dad actas ston ils derschaders leger. Gia l’act d’accusa dumbra passa 300 paginas.

Ils 25 da schaner cumenza il process Raiffeisen-Aduno. La dretgira ha prevedì 4 dis per il process. Avant dretgira stattan:

  • Pierin Vincenz, anteriur schef da la Raiffeisen
  • Beat Stocker, anteriur CEO da l’Aduno

Ad els renfatscha la procura publica da Turitg d’avair

  • cugliunà
  • sfalsifitgà
  • sfraudà.

Accusadas èn anc tschintg ulteriuras persunas che duain avair gidà Vicenz e Stocker.

Suenter che las medias han rapportà ils ultims onns detagliadamain da las renfatschas encunter ils accusads, va savens en emblidanza ch'i ha fin uss anc dà nagina decisiun da dretgira en chaussa. Impurtant è perquai: Per tut las persunas accusadas vala la presumziun d'innocenza.

Il culm dad actas

Da survegnir la survista en quest cas n’è betg simpel. I tutga da s’approfundar en in culm dad actas:

  • Passa 300 paginas dumbra l’act d’accusa.
  • E tenor la NZZ haja la procura publica furnì a la dretgira anc passa 500 ordinaturs.

Trais derschaders s’occupan dal cas. In da quels derschaders sa fatschentia ensemen cun in actuar gia dapi in onn cun il cas, di il pledader da la dretgira cirquitala Patrick Strub. Ils auters dus derschaders prendian temp circa dus mais.

Derschader da reserva

La dretgira haja anc in derscheder da reserva per quest process. Ins veglia simplamain far la segira ch’il process na stoppia betg forsa vegnir spustà perquai ch’in derschadera haja piglià la grippa, di il pledader. Era il derschader da reserva sto sa chapescha esser cudeschà ed avair legì las actas.

Sper la cumplexitad da la materia, èn cumpigliadas bleras persunas. En tut èsi 7 accusads e mintgin d’els ha ses agen advocat. Plinvant datti 4 accusaders privats, sco per exempel la banca Raiffeisen, che fan valair donns e lessan prender regress.

Process en il Volkshaus

Las salas da la dretgira n’èn betg grondas avunda per in tal process. Perquai ha il process lieu en il Volkshaus.

Era il process encunter ils activists da clima, che avevan bloccà il 2019 l’entrada da la Credit Suisse, ha la dretgira cirquitala gia realisà en il Volkshaus.

Dretgira cirquitala Turitg en cifras

Avrir la box Serrar la box

I sa tracta da la pli gronda dretgira civila e penala d'emprima instanza en Svizra. Ella dumbrava la fin dal 2020:

  • 82 derschaders u derschadras
  • 126 actuaras u actuars
  • radund 20'000 cas l'onn

RTR actualitad 12:00

Artitgels legids il pli savens

Scrollar a sanestra Scrollar a dretga